好奄悶，想吹雞！
周街小喇叭！

嘈到拆天，都係為咗集結仲想講故仔嘅人，一齊繼續bilibala。
就算街道再平靜，就算圍爐被監聽，
我哋仲感應到好多學生蠢蠢欲動，想參與呢個地方創造出嚟嘅故事。

今屆學生電影節共徵件超過二百六十份，為歷年之最，
故事歡笑悲憂走馬燈，但都離不開對羈絆的思考。

原因既是年代的一發不可收拾，也是現今學生心智早熟的表現，或更公允的說法，是少年與亂世互為因果的永恆宿命。

趁還未失散，趁有限時間，
我哋用小喇叭嘅心情，在主旋律入面覓尋每一首沒名字的歌，每一個無名字的你。

小喇叭嘅精粹除咗頂硬上，仲要偶然搞搞事，第四屆平地學生電影節有以下新花臣：

• 召喚學生作品，首辦本地競賽
  
  以獎項作為通行世界嘅護照，將我哋嘅故事、歷史和情感傳達至不同角落。二十部競賽作品經初審精挑細選而來，最後由決審評選出五個獎項，各自承載不同意義；評審團亦加添不同界別嘅面孔，審議過程絕對經得起試鍊。
  
  
• 學生話事，首辦與電影節並行嘅「平地影像共學計劃」
  
  招募全港中學生、大專生參與電影欣賞課程，初試評審、訪談及策展，並為本地競賽選出「學生評審團獎」。
  
  
• 傳播學生聲音，以電影節連結在地及世界
  
  「本地競賽及亞洲學生作品選」集結三十部精選作品，編成六個主題節目，題材、類型與手法多變，各自精彩
  
  「純粹睇戲？Filmcation？」搜羅本地競賽遺珠之作，映後Beer Party全日放送
  
  「東南亞短片節—得獎作品集」引介近年致力培育東南亞年輕影人，並活躍馬來西亞的新興短片節SeaShorts Film Festvial，選放其競賽的四部得獎作品
  
  節目有更新，感情在進化，只要你也在凝視，平地還是平地。
  
  祝君與電影節共同小喇叭～